काठमाडाैं । नेपाली कांग्रेसका नेता मीन विश्वकर्माले पार्टी एकता जोगाउन सबै नेताहरूलाई एकताबद्ध हुन आग्रह गरेका छन्।
उनले आधा टिकटमा शेरबहादुर देउवाले हस्ताक्षर गरेको भन्दै आधामा गगन थापाले गरेर भए पनि कांग्रेसी उम्मेदवारको पक्षमा भोट माग्ने वातावरण बनाउन शीर्ष नेताहरूलाई आग्रह गरेका छन्।
देउवानिकट नेता विश्वकर्माले भनेका छन्, ´आधामा देउवाले गर्नु भयो ! बाँकीमा अव गगनले गर्नु हुन्छ ! सबैको सहमतिमा उम्मेदवार चयन गरौँ ! उत्साहका साथ निर्वाचनमा कांग्रेसी उम्मेदवारको पक्षमा भोट माग्ने वातावरण बनाऔ ! यसका लागि देउवा , गगन, पूर्णबहादुर, शेखर एकठाउँमा अहिलै बस्नुस्।´
उनको भनाइ जस्ताको त्यस्तै-
आदरणीय नेताज्यू तथा साथीहरू
जय नेपाल !
हाल हाम्रो पार्टी मात्रै होइन, राष्ट्रवादी लोकतान्त्रिक राजनीतिक दलहरूसँगै मुलुकको राष्ट्रिय स्वाधीनता र सार्वभौमिकता गम्भीर मोडमा छ !
यो अवस्थाबाट मुलुकलाई जोगाउने बलियो आधार घोषित निर्वाचन हुन सक्छ भनेर निष्कर्ष निकाल्यौ ! सबैलाई आव्हान गर्यौ ! जसका कारण सबै दल निर्वाचनमा होमिएका छन् !
तर मुलुकको पहिलो र ठूलो लोकतान्त्रिक दल नेपाली कांग्रेस भने नदुखेको टाउको आफै ठोक्दै रुँदै गरिरहेको छ ! यो हाम्रा लागि मात्र होइन मुलुक र लोकतान्त्रिक प्रणालीका लागि दुर्भाग्य हो !
पार्टीको नियमित महाधिवेशन हुँदै थियो ! विशेष किन गर्नु परेको ? विशेष गर्ने नै भए पार्टीले निर्णय किन नगरेको ? जवर्जस्ती आयोजना हुन लाग्दा पार्टीले अपनत्व र वैधानिकता दिन किन नमानेको ? नीति महाधिवेशन मात्र हो भनेर फेरि नेतृत्व भंग र चयनमा किन प्रवेश गरेको ? आदी इत्यादि यस्तै विषयले कांग्रेस अहिले विवादै विवादले थलिएर उड्नु पर्ने दौडन सकेको छैन ! दौडन पर्ने हिँड्न सकेको छैन ! हिँड्न पर्ने घस्रन सकेको छैन !
विशेष महाधिवेशनको प्रक्रिया, निर्वाचन आयोगको भूमिका र अदालतको निष्क्रियता सँग मेरो पनि विमति छ ! यसका बारेमा आयोग र अदालतमा हाम्रा विमतिहरू दर्ज भएर विचाराधीन छन् !
तर प्रक्रियामा काफी विमतिका वाबजुद पनि फागुन २१ को निर्वाचनको परिणामलाई मध्यनजर गरी हाम्रा बिचमा ऐतिहासिक सहमति र एकता हुनु अपरिहार्य छ !
यसका लागि न विशेष महाधिवेशनबाट सर्वसम्मत निर्वाचित सभापति गगन थापाको एकल निर्णय, नत चौधौँ महाधिवेशनबाट निर्वाचित सभापति देउवाको एकल निर्णयबाट आसन्न निर्वाचनमा पार्टीले विजय हासिल गर्न सक्छ ! केवल सबैको साझा सहमति प्रयास र उम्मेदवारले मात्र राम्रो परिणाम दिन सक्छ !
तसर्थ विवाद अव आयोग मात्रै होइन अदालत पुगिसक्यो ! अव झगडा अदालतमा छौडौँ ! परिणाम जे आउँछ मान्न तयार बनौँ !
हिजो भाद्र २४ मा घर छोड्न तयार भयौ ज्यानका लागि आज घमन्ड त्याग्न तयार बनौँ पार्टीका लागि !
झगडिया अरू कोही होइन हामी एकाघरका हौ !
हिजो भाद्र २४ को उपचार फागुन २१ को निर्वाचन हुन सक्छ भने जस्तै हाम्रो झगडाको मिलन पनि यही निर्वाचनले गराउन सक्छ !
हिजो उम्मेदवारको टिकटमा कसको हस्ताक्षर हुने भन्ने विवाद थियो ! आधामा देउवाले गर्नु भयो ! बाँकीमा अव गगनले गर्नु हुन्छ ! सबैको सहमतिमा उम्मेदवार चयन गरौँ ! उत्साहका साथ निर्वाचनमा कांग्रेसी उम्मेदवारको पक्षमा भोट माग्ने वातावरण बनाऔं ! यसका लागि देउवा , गगन, पूर्णबहादुर, शेखर एकठाउँमा अहिलै बस्नुस्! घेराबन्दीबाट बाहिर आउनुहोस् र निर्णय गर्नुहोस् !
त्यसैले बिपी, सुवर्ण, गणेशमान, किसुनजीले बनाएको, गिरिजा प्रसाद, सुशील र शेरबहादुरले हाँकेको ऐतिहासिक पार्टी नेपाली कांग्रेसका साथीहरूले उत्साह, उमंग र एकताका साथ भन्नेछन् हिजो पनि रूख, आज पनि रूख, भोली पनि रूख भोट के मा रूखमा !
सम्बन्धित खवर
